ბათუმში, ახალგაზრდა კაცი ტრაგიკულად დაიღუპა.
„ლხინი, ჭირად შეიცვალა…სწორედ ასეთ შემთხვევაზეა ნათქვამი. ამ დღეებში, ბათუმში სულის შემძვრელი ტრაგედია დატრიალდა. სოფელ შრომისუბნის მცხოვრები, ყველა საუკეთესო თვისებებით შემკული ახალგაზრდა, ზურაბ ჩხაიძე დაიღუპა. ნათქვამია, სიკვდილისათვის ყველა ცოდვააო… მით უფრო, როცა ის ახალგაზრდას ეხება… იმ ახალგაზრდას, რომელსაც 22 ნოემბერს ქორწილი უნდა ჰქონოდა, ანუ შრომისუბანში ლამაზი ქორწილი უნდა გადაეხადათ, სოფელს, ტოლ-სწორებს მოელხინათ…. მაგრამ… სწორედ, ასეთ შემთხვევაზეა ნათქვამი, კაცი ბჭობდა და ღმერთი იცინოდაო.
არამც და არამც. უფალი არასდროს იმეტებს მისივე შექმნილს ავისა და ცუდისათვის. და მაინც…. მოხდა, ის, რამაც არამარტო ერთი პატარა სოფელი შრომისუბანი, არამედ, სრულიად ლანჩხუთი, კიდევ მეტი, დღევანდელი საინფორმაციო საშუალებების გათვალისწინებით, ალბათ საქართველო შეძრა. სულით ხორცამდე შეაძრწუნა, ჭირისუფლად აქცია… იმ დაწყევლილ დღეს, როცა ზურა ბათუმში საკუთარი მოტოციკლით გადაადგილდებოდა, მოულოდნელად, უკანა მხრიდან მსუბუქი ავტომანქანა შეეჯახა, რომლის საჭეს ქალბატონი მართავდა… ასეა თუ ისე, ტრაგიკული ფაქტი სახეზეა“, – წერს „ლანჩხუთის მოამბე“.
