რუსული მხარე იძულებულია, აფხაზეთში რუსეთის შიდა პასპორტების გაცემის პუნქტები დახუროს, რომლებიც სულ ახლახან, 2026 წლის იანვარში პუტინის გადაწყვეტილებით გაიხსნა. ამის შესახებ აფხაზეთში ე.წ. რუსეთის საელჩოს განცხადებაში წერია, რომელიც მის ვებგვერდზე ვრცელდება.
ამ გადაწყვეტილების შემდეგ აფხაზებს რუსული პასპორტების აღება მხოლოდ რუსეთის ტერიტორიაზე მოუწევთ.
მიზეზად ე.წ. საელჩო იმას ასახელებს, რომ აფხაზი პოლიტიკური ფიგურები, მათ შორის, დე ფაქტო სახალხო კრების წევრები “ამ პუნქტების კანონიერებას ეჭვქვეშ აყენებენ.”
საქმე ეხება დე ფაქტო პარლამენტის თავდაცვისა და ეროვნული უსაფრთხოების კომიტეტის დახურულ, გაფართოებულ სხდომას, რომელიც 4 თებერვალს გაიმართა. მასზე აფხაზებისთვის რუსეთის შიდა პასპორტების გაცემის პროცედურა განიხილეს, რადგნ მისმა კანონიერებამ ე.წ. პარლამენტის წევრებში ეჭვი გააჩინა.
ადგილობრივ სააგენტო “აიაშარას” ცნობით, აფხაზეთში რუსული პასპორტები რამდენიმე რაიონის საპასპორტო სამსახურში ფორმდება. დე ფაქტო პარლამენტარები დაინტერესდნენ, თუ რა ნორმატიულ-სამართლებრივი აქტის საფუძველზე გაიცემა კრასნოდარის მხარის შინაგან საქმეთა სამმართველოში რეგისტრირებული რუსეთის შიდა პასპორტები აფხაზეთის ე.წ. მოქალაქეებზე. ისინი ამ კითხვებით დე ფაქტო შინაგან საქმეთა მინისტრ რობერტ კიუტსა და უწყების საპასპორტო სამმართველოს ხელმძღვანელს, ასტამურ ყოლბაიას მიმართავდნენ.
დახურული შეხვედრის შემდეგ ე.წ. პარლამენტის წევრებმა მედიას დისკუსიის შედეგები გაუზიარეს და განაცხადეს, რომ “არ არსებობს არც ერთი დოკუმენტი, რომელიც აფხაზეთში რუსეთის შიდა პასპორტების გაცემის უფლებამოსილებას იძლევა.” მათ რეკომენდაციით მიმართეს დე ფაქტო სამინისტროს, რომ აფხაზეთში რუსეთის შიდა პასპორტების გაცემის “უკანონო პროცედურა” შეეწყვიტა.
ცნობისთვის: „აფხაზეთის მოქალაქეებისთვის კომფორტული პირობების შექმნის მიზნით, ორმაგი მოქალაქეობის საკითხების მოგვარების შესახებ შეთანხმებას” 2022 წელს მოეწერა ხელი, ხოლო 2025 წლის 25 აპრილს ის ძალაში შევიდა. პუტინის გადაწყვეტილებით, რუსეთის შიდა პასპორტების გაცემის პუნქტები აფხაზეთში მიმდინარე წლის იანვარში გაიხსნა. მანამდე, 2025 წელს აფხაზეთში რუსული მართვის მოწმობების გაცემაც დაიწყო.
bpn.ge