კოლუმბიაში სამხედრო თვითმფრინავი ჩამოვარდა, რომლის ბორტზეც 110 ჯარისკაცი იმყოფებოდა , – ინფორმაციას Reuters-ი ავრცელებს.
- კოლუმბიის თავდაცვის მინისტრის, პედრო სანჩესის ცნობით, Hercules C-130-ის ტიპის სამხედრო თვითმფრინავმა ავიაკატასტროფა ქვეყნის სამხრეთში, პერუს საზღვართან ახლოს განიცადა.
სანჩესის განცხადებით, თვითმფრინავი, რომელსაც კოლუმბიის შეიარაღებული ძალების სამხედროები გადაჰყავდა, ქალაქ პუერტო-ლეგისამოდან აფრენის შემდეგ ჩამოვარდა.
“დაღუპულთა ზუსტი რაოდენობა და ავარიის მიზეზი ჯერჯერობით დაუდგენელია“, – განაცხადა კოლუმბიის თავდაცვის მინისტრმა.
ადგილობრივი გამოცემა BluRadio ხელისუფლებაზე დაყრდნობით წერს, რომ თვითმფრინავს 110 სამხედრო მოსამსახურე გადაჰყავდა.
განახლება:
კოლუმბიაში ავიაკატასტროფის შედეგად, სულ მცირე, 66 სამხედრო მოსამსახურე დაიღუპა.
კოლუმბიის შეიარაღებული ძალების მეთაურის, ჰუგო ალეხანდრო ლოპესის ცნობით, ქვეყნის სამხრეთში ჩამოვარდნილი სამხედრო თვითმფრინავის ბორტზე 128 ადამიანი იმყოფებოდა, მათ შორის 115 სამხედრო მოსამსახურე.
როგორც Reuters-ი წერს, 4 ადამიანი ჯერ კიდევ დაკარგულად ითვლება, ხოლო ათობით დაშავებული საავადმყოფოებში გადაიყვანეს.
ცნობისთვის, Hercules C-130-ის ტიპის სამხედრო თვითმფრინავმა ავიაკატასტროფა კოლუმბიის სამხრეთში, პერუს საზღვართან ახლოს მდებარე ქალაქ პუერტო-ლეგისამოში აფრენისას განიცადა.
ერთ-ერთმა მეხანძრემ ადგილობრივ მედიასთან საუბარში განაცხადა, რომ ჩამოვარდნის შედეგად თვითმფრინავს ცეცხლი გაუჩნდა და ბორტზე არსებული გარკვეული სახის ასაფეთქებელი მოწყობილობები აფეთქდა.
ავიაკატასტროფის ოფიციალური მიზეზი ჯერჯერობით უცნობია.